DALILA
Nunc mihi tabescunt artus, nunc plurimus ore
Pallor, nunc macie pallida membra crepant.
Perduntur nimio teneri languore lacerti,
Quos toties ( nescis? ) colla tulere tua.
Atque manus languent nobis, nunc anulus auri
In gracili digito vix remanere potest.
Hęc nunc ipse leges, nec te perlecta monebunt?
Nec venies toties, corde petite meo?
Eripe dilectam si vis modo vivere amicam,
Si non sanguinei nomen amantis habes.
Cur ego tot sine te iaceo male frigida noctes?
Nec tu cum posses usque venire venis?
Cur mea nunc medio ponuntur membra cubili?
Maxima cur nostri pars vacat una thori?
Cur facis ut molli quo gaudent omnia Somno
Non possim dubio tristis amore frui?
Cur sinis ut luctu dilectae tempora lucis,
Cur sinis ut lachrymis tempora noctis agam?
Non etenim somno ( veniat modo somnus inanis )
Securo possum nocte silente frui.
Sępe etenim nostros oculos vaga terret imago,
Saepe meam mentem tristia spectra movent.
Aut ubi ( quod cupio ) vanam mentita figuram
Quę te praesentat noctis imago venit,
Blandula te excipio simulataque gaudia fingo,
Et ludunt animum ludicra vana meum. 
