Non cito luctifico pulsa dolore cadunt.
Cum corpus tenerum, cum sit cor molle puellis
Vix miserae possunt damna minora pati.
Te varii exercent semper recreantque labores,
Cum mihi sit tanto tempore nulla quies.
Aut tu cum sociis nuda certare palęstra,
Aut potes ad certum mittere tela locum.
Aut velocis equi luctantia colla retorquens
Exiguo positos flectis in orbe pedes.
Vel modo venando vel patria rura colendo,
Piscibus aut inhians tempus inane teris.
Quę mihi si tollas superest nil praeter amare,
Tempora sic lucis, tempora noctis ago.
Aut ego quas habeo de te perquiro puellas,
Et longum de te fallo rogando diem.
Interdum lachrymis in nostra cadentibus ora
Desinit in medio lingua retenta sono.
Solantur verbis miseram, sed gaudia nulla
Accipiunt luctu corda gravata meo.
Te reducem nobis promittunt luce futura,
Sed promissa gemo vana carere fide.
Tu quoque pollicitus fueras sed vana locutus
Non facis ut possint verba tenere fidem.
Turpe viro fuerit sociis promittere falsa,
Vel fictis verbis imposuisse viris. 
