IOSEPHUS SEPHIRAE
Ut veniant famę damna pudenda tuae.
Te moveat dominus qui te confidit in una
In te cor expers suspicionis habens.
Sancta fides moveat lectis praefecta maritis,
Et pietas sancta relligione gravis.
Ac honor ac celeris crescentia murmura famae
Te moveant clarae pignora chara domus.
Te moveat mens hic quo me fortuna labore
Exercet vicibus proh male fida suis.
Nec dominum coeli tantis ignoscere ceptis
Credito, qui mundi sceptra tremenda tenet.
Quid faciat falso cantatus Iuppiter ore
Vatum, non moveat credula corda tibi.
Talia nam gaudent falsi cecinisse poetae
Exosa a superis turba prophana Deis.
Tune putas ( quae te miseram dementia vexat? )
Casibus humanis succubuisse Deos?
Ne te decipiant, caveas, male carmina sana,
Carmina corruptis prodita ab ingeniis.
Te potius moveat summum qui fortis Olympum
Continet, et cuius sub pede terra tremit.
Iuditium hic cunctis aeque dispensat et acres
Pro factis poenas exigit ille malis
O foelix tanti qui iustus iudicis ora
Lumine non timido sustinuisse potest.
Hanc tu si cupias animam cum corpore salvam
Fac timeas, huius fac pia iussa colas.
Hic tibi pro pietate bona sua praemia reddet
Pro stupris poenas suppliciumque dabit.
