IOSEPHO
Quid de te Memphis quid de te Putiphar ipse,
Quid de te poterit regia tota loqui.
Ut vitę parcat coniux, infamis et exul
Uxor quę nunc es regia, turpis eris.
Talia necquicquam tacito sub pectore volvens
Sępius insomnis tempore noctis eram.
Cumque hęc me miseram trepidanti pectore terrent,
Fortior hinc animus spe meliore venit.
Quid dubitas aegram blando proponere mentem?
Quin pellis vanos pectore stulta metus?
Crede mihi non est durum sub corpore molli
Pectus, sed membris conveniensque suis.
Ah mihi quam blando demittit lumina vultu,
Quam pellax illi gratia in ore sedet.
Hocne putas animum contectum corpore agrestem?
Huncne putas placidum tristia posse loqui?
Quin age formosi pectus tentabis amicum,
Cum prece cum lachrymis dulcia verba feras.
Flectes, ne dubita, iuvenis mutabile pectus
Nam placidam mentem mollia membra notant.
Tu quoque cura Iovis nostrę dea maxima gentis
O faveas votis Inachi sancta meis.
Talia, crede mihi, lugenti corde volutans
Blandior infoelix spe meliore mihi.
Illa dies nocuit qua te modo Putiphar emptum
Servum regalem fecit adire domum.
Intrabas ( memini ) veluti cum lucifer ortus
Opposuit luci nubila parva suae. 
