|| bde bar gshegs pa 'jig rten mtha' dag gi ma 'dris pa'i mdza' bshes dam par gyur pa la phyag 'tshal lo |  | bag chags bcas pa'i sgrib tshogs kun bcom zhing |  | spros brjod kun bral chos rnams mtha' dag la |  | kun nas spyan gyur bde gshegs 'gro mgon mchog |  | 'jig rten gsum na bla ma gcig du rgyal |  | byis pa'i skye bo bdag 'dra blo sman zhing ||
mchog gi lam la brtson pa'i stobs chung bas |  | dam pa'i las can khyed skul 'os myin mod | | chos rje ba ma'i gsung mchog thigs tshul brjod |  | 'gro tshogs 'di kun thog myed mi rtag myes |  | kun tu bsregs gyur mthon dman sna tshogs su |  | ma rig sred sogs nyon mongs las kyi mthus |  | sdug bsngal rgya tsho'i lba klong cher bying mnar | | sangs rgyas rnams kyang thogs myed pa res
kyang || grangs las 'das pa'i gdul bya bsgral mod kyi |  | de las bdag cag ci zhig ltar byol te | | kun kyi gso ba'i spyod yul ma gyur mtshar |  | 'di 'dra ma rig mthu la rjes bsams te |  | kun tu skyo ba bsten cing lan mang gis | | bsgoms la srid pa gzhig phyir glo bur du |  | mgo la me shor gsod pas ches myur bsgrim |  | de las thag mar chos dkar thams cad kyi ||
skyed dang gnas dang 'phel ba'i bgrod cig rten |  | bshes gnyen rin chen dam pa bkur sti dang |  | rnyed dang rim 'gro bsgrub sogs kun kyis bsten |  | 'di ni chos kun bsdus pa'i sdom lta bur | | chos sgo 'bum phrag mang po mngon 'du las | | dga legs ma lus sgor gyur gzigs pas na | | thub pas tshangs spyod yongs su rdzogs par gsungs |  | gal te de la drin bzo'i blo myed dam |
khe pa pas ma gus brnyas pas yong byed na |  | skye ba kun du dam pa'i mgon bral 'gyur | | 'gro 'dir de las ma rungs las gang yod | | des na gnas 'di bsam pa kun kyis ni |  | rus pa'i gting nas lam gyi rtsa ba la |  | snying po yod par rnam bltas nam du yang |  | gom tshugs mi 'khyar ba la srog sdos bya | | dal 'byor rin cen dam pa de nas ni |  | sangs rgyas mthar thug bde ba mi zad
gzhi |  | ci la bab kyang chud gzan mi rigs pas | | las mchog bsgrub pas snying po dam pa blang | | 'di ni rnyed dang bstod grags bde ba dag |  | tshol zhing gzhan pa dor 'dod spros pa yi |  | bun long g.yeng ba brkas pas chud gzon na |  | 'gro 'dir de las bdag bslus gzhan gang yod | | de yang mi rtag srin pos nyer bzung bas |  | cung zad tsam yang yid brtan gnas myin te |  | skad cig ri
gzar chu bas myur 'da' zhing |  | nyin mtshan sdod myed pas kyang shugs drag bda' | | gzhan pas blo bur 'chi rkyen bsam 'das pas |  | dus myin 'chi bas bcom myed nye bar 'joms |  | 'on kyang phyin ci log bzhis cher bslus pas | | brgya lam na yang 'di 'dra'i dogs myed mtshar |  | de phyir bdag la phan 'dod skal ldan gyis |  | 'di 'dra rjes bsams nyin mtshan phyad par ni | |
las gzhan myed par dge tshogs bsgrub brtson pas | | g.yul du mtshon lhung len pas ches lhag bsgrim | | de ltar 'ol byir bsams na 'jig rten pa'i | | chos kyi spros la phywas kyi gnas lta bas | | dge legs phra la gcigs po cher bzung nas |  | sgrub la g.yel myed snying po len du nges |  | des na thams cad bor te cha dgos kyang | | las ni myi 'dor grib ma
rin po che'i phreng ba lnga bcu pa zhes bya ba gro lung pa'i 'phrin yig laM rim | 


bzhin rjes 'brang | | 'jig rten sna tshogs las kyis bsgrubs pa ste |  | 'gro kun las kyi bgo skal nges la spyod | | las rnams rang nyid nam yang chud myi za | | dge dang mi dge las dag phra bas kyang | | rnam par smyin pa shin tu cher 'byin te |  | phyi rol sa bon tshogs kyis bskyad du myed | | 'di la mngon sum spyan gyur bde gshegs kyi | | gsung la brten cing lan mang
goms pa yis | | sdig pa phra ba'ang srog bsdos byas yang zhing | | dge legs phra la'ang gcigs cher nan tan bsgrub | | sdig rnams sa bon bcas la cher 'dzem zhing | | dad sogs yan tan 'bad pas spel byed pa |  | 'di ni dang po'i yang dag lta ba ste |  | sangs rgyas nyid kyi rjes 'thun sgrub byed mchog |  | sde snod kun kyi don la mkhas rlom zhing | | tshig rnams ma lus
kha ton 'chad byed kyang |  | cung zad don la thug na nyes legs kyi | | blang dor sgrub pa 'dor na rmongs chen yin | | myig stong ldan yang legs nyes rnam 'byed paʼi | | blo myig dang bral dmus long chen po ste | | mtho ris byang grol lam dang lam myin pa | | myi mthong phyir zhes mkhas mchog dag gis gsungs | | dge ba zag bcas kyis kyang srid pa'i ||
bde ba sgrub tu zad de khams gsum po | | mtha' dag sdug bsngal gsum gyis rab mnar pa | | mye rlubs chen por bying ltar rnam par blta | | de las skyo zhing nges 'byung don gnyer nas | | dge legs lam kun rtsa ba skyabs 'gro bas | | legs bsgrubs zhi ba'i bsam pa brtan po las |  | yan lag drug ldan tshul khrims mchog legs gzung ||
'di ni rgyu dang mi rgyu'i sa bzhin du |  | byang chub sems dang lhag pa'i ting 'dzin sogs | | yon tan ma lus skye dang gnas pa dang |  | 'phel la bgrod pa gcig pa'i gzhi rten mchog |  | de phyir rang gis ji ltar khas blangs pa | | thub pas bcas pa'i bslab gzhi rang bzhin dang | | bcas pa phra la'ang dran shes brtan po yis | | srog bsdos byas te mtshams mi ldab
bsgrim | | gal te dman pa'i bag chags thog myed nas | | brtan par chags las nyon mongs mang sogs rgyus | | cung zad 'das na'ang pang du sbrul 'ongs ltar | | la gor phyir bcos 'bad pas stobs bzhis sbyang | | sdom pa'i rim kun khas len la dpa' zhing |  | khur lci bkur dang snying po'i blo myed par | dran shes nyams pas rtsis myed yal dor na | |
thos sogs kyis kyang mun mthar lhung mi skyobs | | rang nyid bzang pa gnas gyur dge legs kyis | | dbugs phyin gyur kyang 'gro tshogs re re ni | | bdag gi mar gyur brtse bas ngal ba brgya'i | | sdug bsngal 'bar bas bskyangs pa'ang bgrang las 'das | | 'di kun dor nas nges 'byung khrel bor che |  | de phyir khyim rnying me mched rab skrag mi |  | phyir bros
gnyen sdug dran nas slar 'jug ltar | | rang bde btang la byams dang snying rjes blta | | 'di ltar bdag la rab gces nyam thag rnams |  | drin bzos phan dang bde la sbyar ba dang |  | gnod mang gtses las ji ltar bsgral bya zhes | | rtag tu gus par byed pa'i sbyor bas bsgoms | | srid zhir lhung bas gzhan sgrol gnas myed pas | | gzhan don bsgrub la ro gcig


| thogs myed pa'i | | sangs rgyas thob nas 'di kun bsgral bya zhes | | rin cen sems mchog bskyed la 'bad par bya | | phan yon tshad las 'das la spro bya bas | | brjed pa'i rgyu sogs spang zhing dkon mchog dang | | bla ma mchod dang bsdu ba sten sogs pa'i | | tshogs kyis stobs bskyed btan zhing spel las 'bad |  | gsang sngags bsam myi khyab pa'i lam shug
sam || chos kun stong sogs rnam thar sgor zhugs kyang | | 'di dang bral bas rang bder gsal ba yi |  | sems bskyed phas pham bas kyang ches lcir gsungs | | de las bdag dang sems can gces 'dzin pas |  |  'gro la phan pa'i sbyor ba sna tshogs ni |  | lus ngag yid kyis gang 'os ci nus su | | bsgrub pa snying por bya la 'bad pas bslab | | rgyal sras spyod tshogs dpag
yas bsdus pa'i sdom |  | tshul khrims gsum gyis pha rol phyin drug la | | spang bya legs sdom rang bzhin dan du ni | | brtson pa rnam gnyis lhur len yin bar gsung | | de dag kun sgrub rjes 'thun thabs kyi gtso | | thos bsam bsgom pa'i shes rab yan lag bcas | | ye ge 'dri mchod sbyin sogs chos spyod bcu | | g.yel myed dus 'da' skyes bu dam
pa'i las | | gzhan yang rin cen sems mchog des 'phangs pa | | phyag 'tshal mchod sogs kyi yan lag dang |  | bzlas brjod rgyal yum klag sogs re rer yang | | pha rol phyin drug bsdus pas yid brel bya | | 'di dag kun kyi cha shas re re yang | | sems can mi zad don tu kun mkhyen pa'i | | rgya mtshor yongs su gtad las bsod nams ni |  | mi zad sdud
par chu thigs dpe yis gsungs | | 'gal 'brel sems las yid kyi rgyal srid dam | | nye bar brtags don 'jog ltar blo gzhan gyi | | yul la dpyod nus tshul bzhin yid byed pa | | rigs pa'i shes pas de nyid tshol la 'bad | | gang gis chos kun de nyid rnam dpyad na |  | bden pa'i rang bzhin mtha' dag gis dben te | | gang phyir shes dang shes bya ma lus rnams ||
yul dus cha las gcig dang du bral phyir | | gzhan yang rang bzhin gzhan 'gyur mi 'thad pas | | rten 'brel mtha' dag bcos bu'i rang bzhin stong | | lbu ba'i ri dang rtswa'i myi bzhin te | | de dag lasogs tshogs rgya mtshos gzhig | | de lta'i rigs pas mtha' gzhan bkag pa yis | | legs brtags chos rje thub pa'i nges don gsung | | rgyal yum sogs la thub
pa'i ngal ba yis | | skyo dang g.yel myed dus rnams bzla bar bya | | 'di dag thabs dang shes rab bsgrub pa'i tshul | | theg mchog lam kun bsdus pa'i phyogs tsam ste | | nyes tshogs dug shing tshang tshing kun sreg mye | | legs tshogs lta ngan mtsho sgrol gzings mchog lags|| || bzang po'i gnas gyur sngon gyi legs spyad mthus | | shes rab snying rje'i sa bon theg mchog
rigs | | mnyam myed bla mas stobs spel dad blo sogs | | yon tan tshogs mthos gzhan phan nyid la brtson | | sa gsum ston pa'i legs gsungs rin cen mchog | | dgongs 'grel bzang bcas chos kyi seng ge'i sgras | | blo 'chal smra nngan tshogs kun rnam skrag cing || khung du gzhol bar phyogs pas zil non mdzad | | dad pa'i gzhi brtan blo gros


stobs ldan pa | | rang gi gdul bya skal ldan gsung de'i | | phyogs tsam gyis kyang rab tu 'dun 'gyur zhing | | myur du yid 'gegs mdzad pas chos smra mchog | | khyod kyi shes rab spobs stobs mi bzad pas | | gzhan gyis bskul la ltos pa yod myin yang | | phan bsam rnam dag sdom brtson bdag gis ni | | bla ma brgyud las 'ongs pa'i gtaM
'di brdzangs | | gzu lums thag bsrings bde gshegs gsung dang ni | | rigs pa'i lam las ma 'das don gyi bcud | | bdag nyid yi dam 'bad pas rab bsgrub pa | | rang gzhan don kun sgrub byed gnas lnga bkod | | tshul khrims rnam dag rin cen sems sbyong dang | | rgyal sras spyod tshogs sgrub de nyid tshol | | kun kyi rtsa ba bla ma sangs rgyas ltar | |
gus sten rten sogs yan lag dang bcas pa'o || || 'di sbyar las thob bsod nams dri myed des | | 'gro ba ma rig gnyid chen non pa rnams | | chos kyi sang ge'i sgra yis sad byas te | | mchog gi lam gyis go 'phangs mthar 'dren shog ||  || shag kya'i dge slong blo gros 'byung gnas kyis | yid 'thun pa'i bshes pa la spring pa rin po
che'i 'phreng ba lnga bcu pa zhes bya ba rdzogs s+hyo || || dge'o | bkra shis par gyur cig | dge'o | |


